Austurbrú vinnur að gerð sameiginlegrar svæðisáætlunar um meðhöndlun úrgangs fyrir öll sveitarfélög á Austurlandi, en þau eru nú fjögur talsins. Í nóvember 2024 var leitað til Environice um ráðgjöf við síðustu hluta verksins og hófst sú vinna af fullum krafti þá þegar. Árið 2006 hafði Environice aðstoðað við gerð svæðisáætlunar fyrir sveitarfélögin 11 sem þá voru á Austurlandi, en sú áætlun var unnin út frá eldri löggjöf og gildistími hennar rann út í árslok 2020.
Svæðisáætlun er lagaskylda skv. lögum um meðhöndlun úrgangs, nr. 55/2003. Sveitarstjórn, einni eða fleiri í sameiningu, ber skv. lögunum að semja og staðfesta svæðisáætlun sem gildir fyrir viðkomandi svæði til tólf ára í senn og skal sú áætlun fylgja stefnu um meðhöndlun úrgangs og stefnu um úrgangsforvarnir. Í svæðisáætlun eiga m.a. að koma fram upplýsingar um stöðu úrgangsmála á svæðinu, aðgerðir til að bæta endurnotkun, endurnýtingu og förgun og hvernig sveitarstjórn hyggst ná lögbundnum markmiðum í úrgangsmálum. Þetta felur m.a. í sér skoðun á þörf fyrir innviði fyrir meðhöndlun úrgangs á svæðinu. Að lokinni auglýsingu og kynningu áætlunarinnar skulu hlutaðeigandi sveitarstjórnir staðfesta hana og skal hún vera aðgengileg almenningi.
Kjarninn í áætlun af því tagi sem hér um ræðir er annars vegar stefna viðkomandi sveitarfélaga í úrgangsmálum og hins vegar aðgerðaáætlun þar sem lýst ef hvernig sveitarstjórnir hyggist ná fyrrgreindum markmiðum. Þessi hluti áætlunarinnar var m.a. mótaður á stefnumótunarfundi með fulltrúum hlutaðeigandi sveitarfélaga á Egilsstöðum 15. janúar 2025.
Tillaga að svæðisáætlun, ásamt umhverfismatsskýrslu í samræmi við III. kafla laga um umhverfismat framkvæmda og áætlana, nr. 111/2021, liggur nú fyrir og gefst almenningi sex vikna frestur til að kynna sér tillöguna og umhverfismatsskýrsluna og koma athugasemdum sínum á framfæri áður en áætlunin verður afgreidd af hlutaðeigandi sveitarstjórnum. Hægt er að kynna sér tillöguna á vefsíðu Austurbrúar, á vefsíðum hlutaðeigandi sveitarfélaga og á vefsíðu Environice (sjá tengil hér að neðan), en Environice hefur aðstoðað við áætlunargerðina. Skriflegar ábendingar og athugasemdir skulu berast í síðasta lagi 28. apríl 2025 á netfangið sara@austurbru.is eða í pósti á heimilisfangið:
Austurbrú, Vopnafirði
v/ Svæðisáætlunar um meðhöndlun úrgangs á Austurlandi
Hafnarbyggð 19
690 Vopnafirði
Verkkaupi: Austurbrú f.h. sveitarfélaga á Austurlandi
Tímarammi: Nóvember 2024 – apríl 2025
Útgáfa: Svæðisáætlun fyrir Austurland – Tillaga til kynningar